ایران کے پاس ایسا کوئی نہیں ہے جس سے مذاکرات کیے جائیں: ٹرمپ

امریکی صدر ڈونلڈ ٹرمپ نے ریاست الاباما کے شہر موبائل میں ایک انتخابی ریلی سے خطاب کرتے ہوئے ایک بار پھر دعویٰ کیا ہے کہ ایران کے ساتھ جنگ بہت جلد، ممکنہ طور پر نومبر کے وسط مدتی انتخابات کے فوراً بعد ختم ہو سکتی ہے۔ صدر ٹرمپ نے سوال اٹھایا کہ واشنگٹن تہران میں آخر کس سے مذاکرات کرے کیونکہ ان کے پاس معاملات طے کرنے کے لیے کوئی مناسب رہنما موجود نہیں۔ انہوں نے کہا کہ شدید افراطِ زر کے باعث ایرانی معیشت شدید مشکلات کا شکار ہے اور ایران کے پاس بحریہ، فضائیہ یا دفاعی نظام مؤثر نہیں ہے، تاہم ایران کو جوہری ہتھیار حاصل کرنے کی ہرگز اجازت نہیں دی جائے گی۔ امریکی صدر نے آبنائے ہرمز کی امریکی بحری ناکہ بندی کو فولادی دیوار قرار دیتے ہوئے کہا کہ جنگ کے خاتمے سے تیل کی قیمتوں میں نمایاں کمی آئے گی اور امریکا اپنے اسٹریٹجک پیٹرولیم ریزرو کو دوبارہ پُر کرنا شروع کر دے گا۔