خیبرپختونخوا کے جنوبی اضلاع میں 4 ارب 29 کروڑ روپے کی گیس چوری

خیبرپختونخوا حکومت کے عدم تعاون اور مبینہ سیاسی سرپرستی کے باعث مالی سال 2025-26 کے دوران صوبے کے جنوبی اضلاع میں 4 ارب 29 کروڑ 40 لاکھ روپے مالیت کی گیس چوری ہوئی ہے، جس سے گیس نقصانات کی شرح میں گزشتہ سال کے مقابلے میں تقریباً 3.5 فیصد اضافہ ریکارڈ کیا گیا ہے۔ سرکاری اعدادوشمار کے مطابق جنوبی اضلاع میں اوسطاً ہر ماہ تقریباً 35 کروڑ 78 لاکھ اور روزانہ تقریباً ایک کروڑ 18 لاکھ روپے مالیت کی گیس چوری ہو رہی ہے۔ مقامی گیس حکام کا کہنا ہے کہ صوبائی حکومت کے تعاون کے فقدان کی وجہ سے اس لعنت پر قابو پانا مشکل ہو رہا ہے۔ دوسری جانب گیس چوری کا ایک المناک واقعہ کرک کے گاؤں نشپا کے قریب پیش آیا جہاں پائپ لائن سے مبینہ طور پر غیر قانونی کنکشن لینے کے دوران ہونے والے دھماکے کے نتیجے میں بچوں سمیت متعدد افراد شدید زخمی ہو گئے ہیں۔