مندانا کریمی نے 16 سال بعد ایران واپسی کا اعلان کردیا

’بگ باس‘ سیزن 9 سے شہرت پانے والی ایرانی نژاد بھارتی اداکارہ مندانا کریمی نے 16 سال بھارت میں گزارنے کے بعد اپنے آبائی ملک ایران واپس جانے کا حتمی فیصلہ کر لیا ہے۔ اداکارہ کے اس اچانک اعلان نے بھارتی شوبز انڈسٹری اور سوشل میڈیا پر ایک نئی بحث چھیڑ دی ہے۔ مندانا کریمی نے حالیہ علاقائی کشیدگی اور ایران پر امریکہ و اسرائیل کی جانب سے جنگ کے خطرات کے تناظر میں یہ جذباتی فیصلہ کیا ہے۔

اداکارہ نے انسٹاگرام پر اپنے پیغام میں انکشاف کیا کہ ممبئی میں ایک احتجاج میں شرکت کے بعد انہیں شدید سماجی مشکلات اور تنہائی کا سامنا کرنا پڑا۔ ان کا کہنا تھا کہ کئی قریبی دوستوں نے ان سے کنارہ کشی اختیار کر لی، جس نے انہیں ذہنی طور پر توڑ کر رکھ دیا۔ مندانا کریمی نے ایئرپورٹ سے ایک ویڈیو شیئر کرتے ہوئے “گڈ بائے انڈیا” کہا اور بتایا کہ گزشتہ دو ماہ ان کی زندگی کے مشکل ترین اور تنہا ترین دن تھے، جہاں کسی نے ان کے موقف کا ساتھ نہیں دیا۔ انہوں نے کہا کہ اب وقت آگیا ہے کہ وہ اس احساسِ تنہائی سے نکل کر اپنے وطن واپس لوٹ جائیں۔