وزیراعظم اعلیٰ سطح کے وفد کے ہمراہ سہ روزہ دورہ پر سعودی عرب روانہ

وزیراعظم محمد شہباز شریف سعودی ولی عہد اور وزیراعظم شہزادہ محمد بن سلمان بن عبدالعزیز آل سعود کی دعوت پر اعلیٰ سطحی وفد کے ہمراہ سعودی عرب کے رسمی دورے پر روانہ ہو گئے ہیں۔

وزیراعظم کے ہمراہ نائب وزیراعظم و وزیرِ خارجہ محمد اسحاق ڈار، چیف آف ڈیفنس فورسز فیلڈ مارشل سید عاصم منیر، وفاقی وزراء خواجہ محمد آصف، عطاء اللہ تارڑ اور معاونِ خصوصی طارق فاطمی بھی موجود ہیں۔ دورے کے دوران وزیراعظم کی سعودی ولی عہد سے اہم ملاقات طے ہے، جس میں پاکستان اور سعودی عرب کے مابین دیرینہ برادرانہ تعلقات، اقتصادی شراکت داری کو مزید مضبوط بنانے اور خطے کی موجودہ صورتحال پر تفصیلی تبادلہ خیال کیا جائے گا۔

اپنے دورے کے دوران وزیراعظم عمرہ کی سعادت حاصل کریں گے اور مدینہ منورہ میں روضۂ رسول صلی اللہ علیہ وآلہ وسلم پر حاضری بھی دیں گے۔ ترجمان کے مطابق یہ دورہ دونوں ممالک کے مابین دہائیوں پر محیط تزویراتی تعاون، باہمی اعتماد، علاقائی و بین الاقوامی امور پر یکسانیت اور بھائی چارے کے مظبوط رشتوں کی عکاسی کرتا ہے