بانی پی ٹی آئی اور بشریٰ بی بی کو قیدِ تنہائی میں رکھنے کے تاثر کی تردید,اڈیالہ جیل حکام کی رپورٹ پیش

اسلام آباد ہائی کورٹ میں بانی پی ٹی آئی اور ان کی اہلیہ بشریٰ بی بی کو قیدِ تنہائی میں رکھنے کے خلاف دائر درخواست پر وقفے کے بعد دوبارہ سماعت ہوئی، جس کی صدارت جسٹس خادم حسین سومرو نے کی۔ سماعت کے دوران اڈیالہ جیل کے سپرنٹنڈنٹ اور ایڈووکیٹ جنرل اسلام آباد نوید حیات ملک عدالت کے سامنے پیش ہوئے، جبکہ بانی پی ٹی آئی اور بشریٰ بی بی کی جانب سے بیرسٹر سلمان صفدر نے وکالت کی۔

سماعت کے دوران ایڈووکیٹ جنرل اسلام آباد نے عدالت کو بتایا کہ 30 جون کے عدالتی حکم کی تعمیل میں تفصیلی رپورٹ عدالت میں جمع کرا دی گئی ہے۔ انہوں نے واضح کیا کہ بانی پی ٹی آئی اور بشریٰ بی بی کو بی کلاس سے بھی بہتر سہولیات اور مکمل حقوق فراہم کیے جا رہے ہیں اور انہیں کسی بھی اتھارٹی نے قیدِ تنہائی میں نہیں رکھا۔ جیل حکام کی جانب سے عدالت کو آگاہ کیا گیا کہ قیدِ تنہائی کا مطلب 24 گھنٹے سیل میں بند رکھنا ہوتا ہے، جبکہ اس کیس میں ایسا بالکل نہیں ہے اور فریقین کو 7 سیلز پر مشتمل وسیع کمپاؤنڈ میں آزادانہ چلنے پھرنے کی سہولت میسر ہے۔

سپرنٹنڈنٹ اڈیالہ جیل نے عدالت کو بتایا کہ بانی پی ٹی آئی کو ‘دی ایکسپریس ٹریبیون’ اور ‘ڈان’ اخبارات کے علاوہ حال ہی میں 9 مختلف کتب بھی فراہم کی گئی ہیں، جبکہ ان کی معاونت کے لیے ایک سزا یافتہ قیدی کو بطور مشقتی مستقل بنیادوں پر تعینات کیا گیا ہے۔ ایڈووکیٹ جنرل اسلام آباد نوید حیات ملک نے سیکیورٹی تحفظات کی وضاحت کرتے ہوئے کہا کہ ایک بڑی سیاسی جماعت کا رہنما ہونے کے ناطے جیل میں بانی پی ٹی آئی کی سیفٹی اور سیکیورٹی کے سخت اقدامات ضروری ہیں، اور اسی سیکیورٹی کے تحت دیگر قیدیوں سے فاصلے کو بلاوجہ قیدِ تنہائی سے تعبیر کیا جا رہا ہے۔