کنگنا رناوت کا بغیر نام لیے سوناکشی سنہا پر وار؛ لباس اور بات چیت کے انداز کو ’جیب کترا‘ قرار دے دیا

بالی ووڈ اداکارہ اور رکنِ پارلیمنٹ کنگنا رناوت ایک بار پھر اپنی متنازع سوشل میڈیا پوسٹ کے باعث خبروں کی زینت بن گئی ہیں۔ انسٹاگرام پر شیئر کردہ ایک ویڈیو میں کنگنا نے واضح کیا کہ وہ کسی کی جسمانی ساخت کی بنیاد پر اس کی تضحیک (باڈی شیمنگ) نہیں کرتیں، تاہم اسی پوسٹ کے کیپشن میں انہوں نے ایک نامعلوم بالی ووڈ اداکارہ کے لباس اور گفتگو کے انداز کو شدید تنقید کا نشانہ بنایا۔ کنگنا نے طنز کرتے ہوئے تحریر کیا کہ مذکورہ اداکارہ ان دنوں ایسے لباس زیبِ تن کرتی ہیں اور ایسا لہجہ اختیار کرتی ہیں جیسے کوئی ‘جیب کترا’ ہو، جبکہ وہ احتجاج کرنے والوں کے رویے کی بھی حمایت کر رہی ہیں۔ اداکارہ نے مشورہ دیا کہ مذکورہ خاتون اپنے پرانے باوقار اسلوب پر واپس آئیں اور اگر انہیں اچھے اسٹائل کے لیے مدد درکار ہو تو وہ اس کے لیے بھی تیار ہیں۔