ٹرمپ نے امریکی اسلحے کے ذخائر میں کمی کی خبروں کو مسترد کر دیا

امریکی صدر ڈونلڈ ٹرمپ نے سوشل میڈیا پلیٹ فارم ‘ٹروتھ سوشل’ پر جاری ایک بیان میں دعویٰ کیا ہے کہ امریکہ کے پاس جدید اور وافر مقدار میں اسلحہ موجود ہے، جبکہ دفاعی کمپنیاں تاریخ کا سب سے بڑا پیداواِری نیٹ ورک قائم کر رہی ہیں۔ انہوں نے اسلحے کی کمی سے متعلق خبریں لیک کرنے والوں کو غدار قرار دیتے ہوئے سخت سزاؤں کا انتباہ دیا ہے۔ لاس ویگاس میں ایک تقریب سے خطاب کرتے ہوئے ڈونلڈ ٹرمپ نے انکشاف کیا کہ امریکہ دوسری جنگِ عظیم کے بعد سب سے بڑے عسکری حملے کی تیاری کر رہا تھا کہ ایرانی حکام نے رابطہ کر کے مذاکرات کی پیشکش کی۔ امریکی صدر کا کہنا تھا کہ وہ فوجی کارروائی کے بجائے سفارتی حل کو ترجیح دیتے ہیں، تاہم تہران کو کسی صورت جوہری ہتھیار حاصل کرنے کی اجازت نہیں دی جائے گی۔ دوسری جانب، ایران اور عمان نے آبنائے ہرمز سے بحری جہازوں کی محفوظ اور باقاعدہ آمدورفت کے لیے متفقہ راستے پر اتفاق کر لیا ہے جس سے تناؤ میں کمی کا امکان ظاہر کیا جا رہا ہے۔