مہر بانو کی موت کا مذاق اڑانے والی ریل پر سوشل میڈیا صارفین برہم

پاکستان کی معروف اداکارہ اور مصنفہ مہر بانو کی جانب سے اپنے دوستوں کے ہمراہ بنائی گئی ایک ویڈیو سوشل میڈیا پر وائرل ہو گئی ہے، جس پر صارفین کی جانب سے شدید ردعمل اور تنقید کا سامنا ہے۔ ان دنوں شمالی علاقہ جات میں چھٹیاں گزارنے والی اداکارہ نے ایک تفریحی ریل شیئر کی جس میں انہوں نے نیوز رپورٹنگ کے انداز میں اپنی ہی ناگہانی موت کا جھوٹا ڈرامہ رچایا۔ ویڈیو میں مہر بانو کو ایک چٹان پر بے سدھ لیٹے دیکھا جا سکتا ہے جبکہ ان کے دوست رپورٹرز اور لواحقین کا روپ دھار کر ان کی موت کے باعث چھٹیاں خراب ہونے کی اداکاری کر رہے ہیں۔

اس ویڈیو کے وائرل ہوتے ہی سوشل میڈیا صارفین نے اسے سستے مذاق اور بے ہودگی سے تعبیر کرتے ہوئے شدید ناپسندیدگی کا اظہار کیا ہے۔ صارفین کا کہنا ہے کہ موت جیسے انتہائی حساس اور سنجیدہ موضوع کو محض چند لائکس اور توجہ حاصل کرنے کے لیے مذاق بنانا انتہائی غیر ذمہ دارانہ عمل ہے۔ شدید تنقید کے بعد صارفین نے شوبز شخصیات پر زور دیا ہے کہ وہ سوشل میڈیا مواد بناتے وقت اخلاقی حدود اور حساسیت کا خیال رکھیں۔