والد کا انتقال نہیں قتل ہوا تھا: جگن کاظم

پاکستان ٹیلی ویژن کی معروف میزبان اور اداکارہ جگن کاظم نے ایک پوڈکاسٹ کے دوران اپنے والد سید عباس کاظم کے اکتوبر 2002ء میں ہونے والے قتل اور بچپن کے تلخ و پیچیدہ تجربات پر تفصیل سے گفتگو کی ہے۔ انہوں نے بتایا کہ 21 سال کی عمر میں جب وہ نیویارک میں تھیں تو انہیں ایک نامعلوم فون کال کے ذریعے والد کے قتل کی اطلاع ملی، جو ان کی زندگی کا بدترین اور شدید صدمے کا لمحہ تھا۔ اداکارہ نے افسوس کا اظہار کیا کہ ان کے والد ان کی کامیابیاں اور صدارتی ایوارڈ ملنے کی خوشی دیکھنے کے لیے زندہ نہ رہ سکے۔

جگن کاظم نے اپنے خاندانی حالات کا ذکر کرتے ہوئے انکشاف کیا کہ ان کے والد کا رویہ انتہائی سخت، غصے والا اور پرتشدد تھا جو ان کے والدین کی طلاق کی بنیادی وجہ بنا۔ والدین کی علیحدگی کے بعد وہ باری باری دونوں کے گھروں میں رہتی رہیں۔ انہوں نے اعتراف کیا کہ وہ بچپن میں انتہائی ضدی اور باغی مزاج تھیں جبکہ والدہ کے ساتھ بھی ان کا تعلق کافی پیچیدہ رہا، تاہم وقت اور زندگی کے تلخ تجربات نے انہیں پختگی دی اور خود کو بہتر طور پر سمجھنے میں مدد فراہم کی۔