اسلام آباد ہائیکورٹ: گریڈ 17 سے گریڈ 22 تک کے افسران کے الاؤنس میں اضافہ

اسلام آباد ہائی کورٹ نے جوڈیشل افسران اور ہائی کورٹ کے افسران کے لیے ٹرانسپورٹ مونیٹائزیشن الاؤنس میں ترمیم کا باضابطہ نوٹیفکیشن جاری کر دیا ہے، جس کے تحت گریڈ 17 سے گریڈ 22 تک کے افسران کے الاؤنسز میں نمایاں اضافہ کر دیا گیا ہے۔ جاری کردہ نوٹیفکیشن کے مطابق ان نئے اور ترمیم شدہ نرخوں کا اطلاق یکم جولائی 2026 سے ہو گا۔

نوٹیفکیشن کی تفصیلات کے مطابق گریڈ 22 کے افسران کے لیے ماہانہ ٹرانسپورٹ مونیٹائزیشن الاؤنس 2 لاکھ 50 ہزار روپے مقرر کیا گیا ہے۔ جبکہ گریڈ 21 کے افسران کے لیے 1 لاکھ 95 ہزار روپے، گریڈ 20 کے لیے 1 لاکھ 75 ہزار روپے اور گریڈ 19 کے افسران کے لیے 1 لاکھ 50 ہزار روپے ماہانہ الاؤنس منظور کیا گیا ہے۔

اسی طرح درمیانے درجے کے افسران کے لیے بھی مراعات میں اضافہ کیا گیا ہے، جس کے تحت گریڈ 18 کے افسران کو 1 لاکھ روپے اور گریڈ 17 کے افسران کو 60 ہزار روپے ماہانہ ٹرانسپورٹ مونیٹائزیشن الاؤنس فراہم کیا جائے گا۔ نوٹیفکیشن میں مزید وضاحت کی گئی ہے کہ اس فیصلے سے سامنے آنے والے تمام تر مالیاتی اخراجات اسلام آباد ہائی کورٹ اور ڈسٹرکٹ جوڈیشری کے جاری مالی سال 2026-27 کے لیے مختص شدہ بجٹ ہی سے پورے کیے جائیں گے۔