راولپنڈی میں رواں سال ڈینگی کے 6 کیسز سامنے آ گئے، 67 ہزار سے زائد لاروا تلف، ہیلتھ اتھارٹی کی رپورٹ جاری

راولپنڈی ڈسٹرکٹ ہیلتھ اتھارٹی نے سال 2026 کے ڈینگی اعداد و شمار اور انسدادِ ڈینگی مہم کی کارکردگی رپورٹ جاری کر دی ہے۔ ڈویژنل ڈائریکٹر ہیلتھ راولپنڈی ڈاکٹر اعجاز کے مطابق رواں سال اب تک 2,603 افراد کی ڈینگی اسکریننگ کی جا چکی ہے، جس کے دوران 6 افراد میں ڈینگی وائرس کی تصدیق ہوئی ہے جبکہ خوش آئند بات یہ ہے کہ اب تک اس وائرس سے کوئی ہلاکت رپورٹ نہیں ہوئی۔

محکمہ صحت کے مطابق رواں سال کے دوران 7 مریض مختلف اسپتالوں میں داخل ہوئے، تاہم اس وقت ڈینگی کے کنفرم داخل مریضوں کی تعداد صفر ہے۔ صرف جولائی 2026 میں 4 کیسز رپورٹ ہوئے جن کا تعلق ڈھوک حسو جنوبی، کوٹھا کلاں اور کونٹریلا سے تھا۔ سرویلنس کے دوران ڈینگی لاروا کی سب سے زیادہ موجودگی یونین کونسل گرجا، گلستان کالونی (CTC-5) اور رحیم آباد (CTC-2) میں ریکارڈ کی گئی۔

انسدادِ ڈینگی مہم کی تفصیلات بتاتے ہوئے ڈویژنل ڈائریکٹر ہیلتھ نے بتایا کہ 1,460 ٹیموں نے 36 لاکھ 71 ہزار سے زائد گھروں اور 12 لاکھ 48 ہزار سے زائد مقامات کی چیکنگ کی۔ اس دوران 56,964 گھروں اور 10,380 مقامات سے ڈینگی لاروا برآمد ہوا، جسے کارروائی کرتے ہوئے تلف (67,344 مجموعی لاروا) کر دیا گیا۔ ڈینگی ایس او پیز کی سنگین خلاف ورزیوں پر سخت اقدامات کرتے ہوئے 1,384 مقدمات درج، 339 عمارتیں سیل، 1,340 چالان اور 15 لاکھ 24 ہزار روپے کے جرمانے عائد کیے گئے۔ ڈسٹرکٹ ہیلتھ اتھارٹی نے شہریوں سے اپیل کی ہے کہ وہ اپنے گھروں کے اندر اور اطراف میں پانی جمع نہ ہونے دیں اور تمام احتیاطی تدابیر پر سختی سے عمل کریں۔