حافظ نعیم الرحمن کی 7 اگست کو ملک گیر احتجاج کی اپیل

امیر جماعت اسلامی حافظ نعیم الرحمن نے ایک خاص ویڈیو پیغام کے ذریعے عوام سے 7 اگست کو ملک گیر احتجاج میں بھرپور شرکت کی اپیل کرتے ہوئے کہا ہے کہ شہری جمعہ کی نماز کے بعد شام 4 بجے سڑکوں پر نکلیں اور احتجاجاً اپنی گاڑیاں اور موٹر سائیکلیں بند کریں۔

انہوں نے حکومت پر شدید تنقید کرتے ہوئے کہا کہ حکومت نے پیٹرولیم مصنوعات پر بھاری لیوی اور عام کھانے پینے کی اشیا پر ناجائز ٹیکس عائد کر رکھے ہیں، جس کا تمام تر بوجھ براہِ راست عام شہریوں پر پڑ رہا ہے۔ انہوں نے انکشاف کیا کہ گزشتہ ایک ماہ کے دوران 27 ضروری اشیائے خور و نوش کی قیمتوں میں مسلسل اضافہ ہوا ہے، اور غریب موٹر سائیکل سوار سے لے کر عام آدمی تک ہر شخص اس گرانی کی زد میں ہے۔

حافظ نعیم الرحمن نے دعویٰ کیا کہ گزشتہ ایک سال کے دوران حکومت نے محض پیٹرولیم لیوی کی مد میں عوام سے تقریباً 1900 ارب روپے وصول کیے ہیں، جبکہ غیر رجسٹرڈ شہری بھی بالواسطہ ٹیکسوں (Indirect Taxes) کے ذریعے رقوم ادا کر رہے ہیں۔ امیر جماعت اسلامی نے خبردار کیا کہ اگر عوام نے بجلی کی قیمتوں کی طرح منظم انداز میں آواز نہ اٹھائی تو مزید ٹیکس عائد کیے جائیں گے، کیونکہ اشرافیہ کی مراعات بحال ہیں جبکہ تمام معاشی دباؤ غریب طبقے پر ڈالا جا رہا ہے۔