پاکستان جلد یوریشین اکنامک یونین کے ساتھ آزاد تجارتی معاہدہ کرے گا، فیصل نیاز ترمذی

روس میں پاکستان کے سفیر فیصل نیاز ترمذی نے اعلان کیا ہے کہ پاکستان نے یوریشین اکنامک یونین (EAEU) کے ساتھ آزاد تجارتی معاہدے (FTA) کے لیے باضابطہ عمل کا آغاز کر دیا ہے، جسے اگلے چند ماہ سے دو سال کے عرصے میں حتمی شکل دیے جانے کا امکان ہے۔

سفیرِ پاکستان نے گفتگو کرتے ہوئے کہا کہ پاکستان نارتھ ساؤتھ ٹرانسپورٹ کوریڈور کا ایک قدرتی اور اہم شراکت دار ہے، اسی لیے یوریشین خطے کے ممالک کے ساتھ تجارت، اقتصادی سرمایہ کاری اور عوامی تعلقات کو استوار کرنا پاکستان کی بنیادی ترجیحات میں شامل ہے۔ انہوں نے بتایا کہ پاکستان کے وزیرِ تجارت اور یوریشین اکنامک یونین کی اعلیٰ قیادت کے درمیان اس حوالے سے مسلسل رابطے قائم ہیں اور امید ہے کہ یہ آزاد تجارتی معاہدہ جلد طے پا جائے گا۔

فیصل نیاز ترمذی نے علاقائی رابطہ کاری کی اہمیت پر زور دیتے ہوئے کہا کہ وہ مستقبل قریب میں ایک ایسا وقت دیکھ رہے ہیں جب مرمانسک، منسک اور ماسکو سے شہری زمینی راستوں کے ذریعے اسلام آباد، کراچی اور گوادر تک باآسانی سفر کر سکیں گے، جس سے سیاحت اور تجارت کو ایک نیا موڑ ملے گا۔ ان کا مزید کہنا تھا کہ پاکستان روس، قازقستان، بیلاروس اور کرغزستان جیسے ممالک کے ساتھ اقتصادی اور ثقافتی شراکت داری کو فروغ دے کر پائیدار امن اور خطے کے باہمی انضمام کی بنیاد مضبوط کرنا چاہتا ہے۔