گوگل اے آئی کے مشوروں نے صارفین کی صحت کو خطرے میں ڈال دیا؟

گوگل کے سرچ نتائج میں شامل اے آئی اوورویوز کے بارے میں ماہرین صحت اور فلاحی اداروں نے شدید تحفظات کا اظہار کرتے ہوئے خبردار کیا ہے کہ ان میں موجود بعض غلط طبی معلومات مریضوں کی صحت کیلئے خطرناک ثابت ہو سکتی ہیں۔

کمپنی کا دعویٰ ہے کہ اے آئی اوورویوز صارفین کیلئے مددگار اور قابلِ اعتماد ہیں، تاہم ماہرین نے متعدد ایسی مثالیں سامنے لائی ہیں جنہیں انہوں نے نہ صرف غلط بلکہ خطرناک بھی قرار دیا۔ ایک کیس میں گوگل کے اے آئی خلاصے میں لبلبے کے کینسر کے مریضوں کو زیادہ چکنائی والی غذاؤں سے پرہیز کا مشورہ دیا گیا، جسے ماہرین کے مطابق بالکل غلط اور مریض کی صحت کیلئے نقصان دہ قرار دیا گیا ہے۔

اسی طرح جگر کے فنکشن ٹیسٹس سے متعلق فراہم کی گئی معلومات بھی درست نہیں تھیں، جس کے نتیجے میں شدید بیماری میں مبتلا افراد خود کو صحت مند سمجھنے کی غلط فہمی میں مبتلا ہو سکتے ہیں۔ خواتین کے کینسر ٹیسٹس، خصوصاً پیپ ٹیسٹ کے حوالے سے بھی سرچ نتائج میں غلط معلومات سامنے آئیں، جہاں بعض اوقات اسے اندام نہانی کے کینسر کا ٹیسٹ ظاہر کیا گیا، حالانکہ یہ حقیقت کے منافی ہے۔

صحت کے ماہرین اور مختلف چیریٹیز نے خبردار کیا ہے کہ اس قسم کی غلط معلومات لوگوں کو بروقت علاج سے دور رکھ سکتی ہیں اور بعض صورتوں میں جان لیوا نتائج کا سبب بھی بن سکتی ہیں۔ مریضوں کے حقوق کے فورم کی ڈائریکٹر صوفی رینڈل نے کہا کہ گوگل کے اے آئی اوورویوز آن لائن سرچز میں غلط معلومات دے کر صارفین کی صحت کو خطرے میں ڈال سکتے ہیں۔

میری کیوری چیریٹی کی اسٹیفنی پارکر نے بھی تشویش کا اظہار کرتے ہوئے کہا کہ لوگ پریشانی کے عالم میں انٹرنیٹ پر انحصار کرتے ہیں اور اگر اس دوران انہیں غلط معلومات ملیں تو یہ ان کیلئے شدید نقصان دہ ہو سکتا ہے۔

برطانوی اخبار دی گارڈین کی رپورٹ میں یہ بھی بتایا گیا ہے کہ گوگل کے اے آئی اوورویوز نے نفسیاتی بیماریوں اور کھانے پینے کی عادات کے حوالے سے بھی بعض خطرناک اور گمراہ کن مشورے دیے، جس سے لوگ ضروری طبی مدد لینے سے گریز کر سکتے ہیں۔