گرم گرم چائے اور کافی پینے سے کینسر کا خطرہ، طبی تحقیق میں ہوشربا انکشاف

گرم مشروبات عموماً ذہنی سکون کا باعث سمجھے جاتے ہیں، تاہم اگر انہیں حد سے زیادہ گرم حالت میں پیا جائے تو یہ صحت کے لیے خطرناک ثابت ہو سکتے ہیں۔ ماہرین کا کہنا ہے کہ اکثر افراد چائے یا کافی اس وقت نوش کرتے ہیں جب اس میں سے تیز دھواں نکل رہا ہوتا ہے، لیکن یہ عادت گلے اور غذا کی نالی کو نقصان پہنچا سکتی ہے۔

برطانیہ کے بائیو بینک میں کیے گئے ایک ریویو شدہ سائنسی مطالعے کے مطابق، جو افراد مسلسل بہت زیادہ گرم چائے یا کافی پیتے ہیں، ان میں وقت کے ساتھ گلے کے سرطان (Esophageal Cancer) کا خطرہ بڑھ جاتا ہے۔ تحقیق سے ظاہر ہوتا ہے کہ اس خطرے کی بنیادی وجہ مشروب کی زیادہ حرارت ہے، نہ کہ کوئی کیمیائی عنصر۔

ماہرین کے مطابق غذا کی نالی معدے کی طرح مضبوط حفاظتی تہہ نہیں رکھتی بلکہ یہ نرم اور حساس ہوتی ہے۔ بار بار انتہائی گرم مشروبات پینے سے گلے کی اندرونی تہہ میں جلن پیدا ہوتی ہے، جو وقتی طور پر ٹھیک ہو جاتی ہے، مگر مسلسل یہ عمل خلیوں کے رویے میں تبدیلی کا سبب بن سکتا ہے اور سرطان کے امکانات بڑھا دیتا ہے۔

تحقیق میں یہ بھی سامنے آیا ہے کہ وہ ممالک جہاں چائے یا دیگر مشروبات ابال کر یا دھواں نکلتے ہوئے پینے کا رواج عام ہے، وہاں گلے کے سرطان کی شرح نسبتاً زیادہ پائی جاتی ہے۔ یو کے میں ہونے والے مطالعے کے نتائج بھی اسی جانب اشارہ کرتے ہیں۔

ماہرین کا کہنا ہے کہ بڑے گھونٹ زیادہ نقصان دہ ہوتے ہیں کیونکہ گرم مشروب زیادہ دیر تک گلے کے اندر رہتا ہے۔ تحقیق کے مطابق روزانہ آٹھ یا اس سے زیادہ انتہائی گرم مشروبات پینے سے گلے کے سرطان کا خطرہ کئی گنا بڑھ سکتا ہے۔

ماہرین صحت نے مشورہ دیا ہے کہ چائے یا کافی کو کچھ دیر ٹھنڈا ہونے دیا جائے اور نیم گرم حالت میں پیا جائے تاکہ اس ممکنہ خطرے سے بچا جا سکے۔