امتحانات میں نقل کرنے کے لئے سمارٹ چشمے کرائے پر دستیاب

بیجنگ: چین میں تعلیمی نظام کو ایک جدید اور پیچیدہ چیلنج کا سامنا ہے جہاں طلبہ امتحانات میں نقل کے لیے مصنوعی ذہانت سے لیس ‘اسمارٹ گلاسز’ کا سہارا لے رہے ہیں۔ فیوچریزیم (Futurism) کی ایک رپورٹ کے مطابق، یہ جدید عینکیں چینی سیکنڈ ہینڈ مارکیٹ پلیس ’شیان یو‘ پر محض 40 سے 80 یوآن (تقریباً 1,500 سے 3,000 پاکستانی روپے) روزانہ کے عوض کرایے پر دستیاب ہیں۔

یہ اسمارٹ گلاسز دیکھنے میں بالکل عام نظر آنے والی عینکوں جیسے ہوتے ہیں، لیکن ان کے فریم میں انتہائی باریک خفیہ کیمرے، آڈیو سسٹم اور اے آئی ماڈلز نصب ہوتے ہیں۔ طلبہ ان کے ذریعے امتحانی پرچے کو اسکین کرتے ہیں، جس کے بعد سسٹم فوری طور پر ریاضی کے پیچیدہ فارمولے حل کر دیتا ہے یا انگریزی پیراگراف کا ترجمہ کر کے عینک کے اندر لگی چھوٹی ہائی ٹیک اسکرین پر دکھا دیتا ہے۔ شینزین کے ایک تاجر نے انکشاف کیا ہے کہ اس نے صرف چار ماہ میں ایک ہزار سے زائد طلبہ کو یہ آلات فراہم کیے۔

حیرت انگیز طور پر، جہاں ایک طرف ان کا غلط استعمال ہو رہا ہے، وہیں چینی حکومت اپنی قومی سبسڈی اسکیم کے ذریعے ژیومی اور علی بابا جیسے مقامی برانڈز کے اسمارٹ گلاسز کو فروغ دے رہی ہے۔ ماہرینِ تعلیم نے خبردار کیا ہے کہ اگر امتحانی طریقہ کار میں فوری تبدیلی نہ لائی گئی تو ٹیکنالوجی کی یہ ‘جاسوسی’ محنت اور قابلیت کی جگہ لے لے گی۔