کراچی میں دہشت گردی کا بڑا منصوبہ ناکام، بی ایل اے کے 2 دہشت گرد گرفتار

کراچی میں کاؤنٹر ٹیررزم ڈیپارٹمنٹ (سی ٹی ڈی) اور حساس اداروں نے مشترکہ کارروائی کرتے ہوئے دہشت گردی کا ایک بڑا اور خطرناک منصوبہ ناکام بنا دیا ہے اور فورسسز نے دعویٰ کیا ہے کہ کالعدم تنظیم بلوچ لبریشن آرمی (بی ایل اے) سے تعلق رکھنے والے 2 مبینہ دہشت گردوں کو گرفتار کر لیا ہے۔ سی ٹی ڈی حکام کے مطابق، گرفتار ملزمان میں مجاہد بلوچ اور فرید بلوچ عرف ذاکر بن شامل ہیں، جنہوں نے کالعدم تنظیم کے تربیتی کیمپوں سے ریکی اور کمیونیکیشن کی خصوصی تربیت حاصل کر رکھی ہے۔ ملزمان بی ایل اے کے کمانڈرز ساجد بلوچ اور بشیر زیب کی ہدایت پر کراچی میں مقیم تھے اور حساس تنصیبات سمیت قانون نافذ کرنے والے اداروں کے خلاف دہشت گردی کا نیٹ ورک قائم کرنے کے لیے سرگرم تھے۔ کارروائی کے دوران ملزمان کے قبضے سے 4 کلو گرام بارودی مواد، ڈیٹونیٹر، پرائما کارڈ اور بال بیرنگز برآمد کیے گئے ہیں۔ ملزمان کے خلاف تھانہ سی ٹی ڈی میں مقدمہ درج کر کے مزید تحقیقات کے لیے خصوصی ٹیمیں تشکیل دے دی گئی ہیں۔