دنیا کے سب سے چھوٹے قد کے جوڑے کا منفرد گھر مرکزِ توجہ

برازیل کے علاقے ایٹا پیوا سے تعلق رکھنے والے پاؤلو گیبرئیل ڈی سلوا بیروس اور کیٹیوشیا لی ہوشینو کو گنیز ورلڈ ریکارڈز نے دنیا کا سب سے کم قد رکھنے والا شادی شدہ جوڑا قرار دیا ہے، جن کا منفرد انداز میں ڈیزائن کیا گیا گھر ان دنوں لوگوں کی توجہ کا مرکز بنا ہوا ہے۔ برازیل کے ایک ٹی وی پروگرام میں اس جوڑے کے گھر کی خصوصی جھلک دکھائی گئی جہاں 40 سالہ پاؤلو اور 36 سالہ کیٹیوشیا رہائش پذیر ہیں۔ دونوں کا مجموعی قد 71.42 انچ ہے، جس کے باعث ان کے پورے گھر، بشمول کچن کاؤنٹر، سنک، الماریوں، لائٹ سوئچ اور دروازوں کے ہینڈلز کو ان کے قد کے مطابق معمول سے کافی نیچے ڈیزائن کیا گیا ہے۔ تقریباً دو دہائیاں قبل آن لائن ملاقات سے شروع ہونے والے اس رشتے کو 2016 میں لندن میں شادی کے بندھن میں تبدیل کیا گیا تھا۔ جوڑے کا کہنا ہے کہ گھر سے باہر انہیں دنیا کے مطابق خود کو ڈھالنا پڑتا ہے، لیکن یہ خصوصی گھر ان کے لیے ایک آرام دہ اور محفوظ پناہ گاہ ہے