اٹلی: طالب علموں نے دنیا کا سب سے بڑا کاغذی جہاز تیار کرلیا

اٹلی کی پیسا یونیورسٹی کے انجینئرنگ کے 15 طالب علموں نے دنیا کا سب سے بڑا کاغذی جہاز تیار کر کے گنیز ورلڈ ریکارڈ اپنے نام کر لیا ہے۔ اس دیوقامت کاغذی جہاز کے پروں کی چوڑائی 20.04 میٹر اور کل لمبائی 7 میٹر ہے، جسے بولونیا میں منعقدہ ‘وی میک فیوچر فیئر’ میں نمائش کے لیے پیش کیا گیا۔ پراجیکٹ ٹیم کے مطابق اس منفرد منصوبے کی ابتدا کلاس روم میں محض ایک مذاق سے ہوئی تھی، جسے بعد میں ایروناٹیکل انجینئرنگ کے اصولوں کے تحت ایک باقاعدہ سائنسی تحقیق میں بدل دیا گیا۔ تقریباً 300 کلوگرام کاغذ اور 60 کلوگرام گوند کی مدد سے تیار کردہ یہ جہاز اپنی آزمائشی اڑان میں 59 میٹر تک پرواز کرنے میں کامیاب رہا، جس نے سنہ 2013 میں قائم ہونے والا پچھلا عالمی ریکارڈ توڑ دیا۔ طالب علموں نے جہاز کو مضبوط اور ہلکا رکھنے کے لیے کاغذ کو شہد کی مکھیوں کے چھتے جیسی منفرد ساخت میں جوڑا۔