ڈزنی لینڈ: 70 سال میں ایک ارب مہمانوں کا تاریخی سنگِ میل عبور کر لیا

امریکا کے معروف تھیم پارک ‘ڈزنی لینڈ’ نے اپنے قیام کے 70 سال مکمل ہونے پر ایک عظیم تاریخی سنگِ میل عبور کرتے ہوئے اپنے ‘ایک اربویں’ مہمان کا خیرمقدم کیا ہے۔ ڈزنی پارکس بلاگ کے مطابق، یہ منفرد اعزاز امریکی ریاست ایریزونا سے تعلق رکھنے والے 8 سالہ آندریس روبلز اور ان کے والدین کو حاصل ہوا، جو تفریح کی غرض سے ڈزنی لینڈ آئے تھے۔ 1955 میں امریکی ریاست کیلیفورنیا کے شہر ایناہائم میں قائم ہونے والا ڈزنی لینڈ دنیا کے مقبول ترین تفریحی مقامات میں شمار ہوتا ہے، جسے جدید تھیم پارک انڈسٹری کی بنیاد رکھنے کا اعزاز بھی حاصل ہے۔ اس یادگار موقع پر روبلز خاندان کے اعزاز میں ایک خصوصی تقریب منعقد کی گئی، جہاں مکی ماؤس اور منی ماؤس سمیت ڈزنی کے دیگر مقبول کرداروں نے ان کے ساتھ جشن منایا اور ایک یادگاری تختی کی نقاب کشائی کی گئی جس پر مہمانوں کی کل تعداد ایک ارب درج تھی۔ ڈزنی انتظامیہ کا کہنا ہے کہ یہ سنگِ میل اس بات کا ثبوت ہے کہ والٹ ڈزنی کا خواب آج بھی دنیا بھر کے لوگوں کے لیے خوشیاں بانٹ رہا ہے۔