امریکی صدر ٹرمپ نیٹو اجلاس میں شرکت کیلئے ترکیہ پہنچ گئے

امریکی صدر ڈونلڈ ٹرمپ دنیا کے سب سے بڑے فوجی اتحاد ‘نیٹو’ (NATO) کے 36 ویں سربراہی اجلاس میں شرکت کے لیے ترکیہ کے دارالحکومت انقرہ پہنچ گئے ہیں۔

امریکی صدر کو لے جانے والا خصوصی طیارہ انقرہ کے ہوائی اڈے پر اترا۔ اس اہم ترین اجلاس کے دوران نیٹو کے مستقبل، یورپی سلامتی اور رکن ممالک کے دفاعی اخراجات سمیت کئی کلیدی معاملات پر تفصیلی بات چیت متوقع ہے۔

یہ بیٹھک ایک ایسے وقت میں ہو رہی ہے جب امریکی صدر ڈونلڈ ٹرمپ نے نیٹو کے رکن ملکوں پر فوجی اخراجات بڑھانے کے لیے اپنا دباؤ دوبارہ بڑھا دیا ہے۔ اس دباؤ کے جواب میں توقع کی جا رہی ہے کہ یورپی ممالک اربوں ڈالر کے نئے فوجی معاہدوں کا اعلان کریں گے۔

تاہم، امریکی صدر نے اس اجلاس سے قبل ہی نیٹو کو ایک بار پھر کڑی تنقید کا نشانہ بنایا ہے۔ عرب میڈیا کے مطابق، صدر ڈونلڈ ٹرمپ نے اتحادی ممالک پر ناراضگی کا اظہار کرتے ہوئے کہا کہ نیٹو ممالک امریکا کی جانب سے ایران کے خلاف جنگ میں مناسب تعاون نہیں کر رہے اور کئی ارکان اپنی ذمہ داریاں پوری کرنے میں ناکام رہے ہیں۔ دوسری جانب یورپی حکام نے صدر ٹرمپ کے الزامات کو یکسر مسترد کرتے ہوئے مؤقف اپنایا ہے کہ انہوں نے بڑی حد تک اپنی ذمہ داریاں پوری کی ہیں۔ یورپی حکام کے مطابق، انہوں نے امریکا کو اپنے فضائی راستے اور فوجی اڈے استعمال کرنے کی مکمل اجازت دی، حالانکہ انہیں ایران کے خلاف کارروائی سے قبل اعتماد میں بھی نہیں لیا گیا تھا۔