پاکستان، کرغزستان کا تجارت، سرمایہ کاری اور سٹریٹجک شراکت داری پر اتفاق

صدرِ پاکستان آصف علی زرداری اپنے چار روزہ سرکاری دورے پر کرغزستان پہنچ گئے ہیں، جہاں انہوں نے کرغز صدر سادیر جپاروف سے ملاقات کی۔ ملاقات کے بعد جاری مشترکہ اعلامیے کے مطابق، دونوں رہنماؤں نے پاک-کرغز دوطرفہ تعلقات کو اسٹریٹجک شراکت داری میں بدلنے اور تجارت، معیشت، سرمایہ کاری اور توانائی کے شعبوں میں تعاون کو مزید مضبوط بنانے کے عزم کا اعادہ کیا۔ دونوں صدور نے وسطی اور جنوبی ایشیا کے درمیان توانائی رابطے کے اہم ذریعے ‘کاسا-1000’ (CASA-1000) منصوبے پر مؤثر عمل درآمد کی اہمیت پر زور دیا اور پاکستان کی بندرگاہوں سمیت کرغزستان کی ٹرانزٹ صلاحیتوں سے فائدہ اٹھانے پر اتفاق کیا۔ وفود کی سطح پر مذاکرات کرتے ہوئے صدر آصف علی زرداری نے کہا کہ دونوں ممالک مشترکہ مذہبی، تاریخی اور ثقافتی رشتوں میں بندھے ہوئے ہیں اور پاکستان مناسب قیمتوں پر اپنی مصنوعات کرغزستان کو فراہم کرنے کا خواہش مند ہے۔ ملاقات میں کان کنی، آئی ٹی، سیاحت، ادویات سازی، اور حلال انڈسٹری سمیت دہشت گردی، منظم جرائم اور سائبر کرائم کے خلاف مشترکہ اقدامات پر بھی اتفاق کیا گیا۔