ملکی برآمدات میں اضافے کے لیے ایس ایم ایز کو قرضوں کی فراہمی آسان بنائی جائے؛ وزیرِ اعظم

وزیرِ اعظم محمد شہباز شریف نے سمیڈا (SMEDA) کے جائزہ اجلاس کی صدارت کرتے ہوئے ملکی برآمدات میں اضافے کے لیے چھوٹے اور درمیانے درجے کی صنعتوں (SMEs) کو قرضوں کی فراہمی آسان بنانے کی ہدایت جاری کی ہے۔ انہوں نے کمرشل بینکوں کو ہدایت کی کہ وہ ایس ایم ایز کے لیے خصوصی پراڈکٹس تیار کریں، اور سمیڈا کو کسانوں کی اجناس و پھلوں کی پراسیسنگ، فیزیبیلٹی کی تیاری، اور نوجوانوں بالخصوص خواتین آنٹرپرنیورز کو کاروبار شروع کرنے میں بھرپور معاونت فراہم کرنے کا حکم دیا۔ وزیرِ اعظم نے اسٹیٹ بینک اور کمرشل بینکوں کے ساتھ مل کر قرضوں تک رسائی کے لیے ایک جامع لائحہ عمل مرتب کرنے پر زور دیا ہے۔ اجلاس کو بریفنگ میں بتایا گیا کہ عالمی منڈی تک رسائی بڑھانے کے لیے رواں برس 700 ایس ایم ایز کی 16 بین الاقوامی ایونٹس میں شرکت یقینی بنائی گئی اور 35 شہروں میں کاروباری ٹریننگ دی گئی۔ اس اہم اجلاس میں نائب وزیرِ اعظم و وزیرِ خارجہ سینیٹر اسحاق ڈار، وفاقی وزیر ڈاکٹر مصدق ملک، معاونِ خصوصی ہارون اختر سمیت ویڈیو لنک کے ذریعے چاروں صوبوں کے چیف سیکریٹریز اور ماہرین نے شرکت کی۔