وفاقی حکومت نے نیشنل پاپولیشن کونسل تشکیل دے دی، وزیر اعظم چیئرمین اور آرمی چیف رکن مقرر

وفاقی حکومت نے ملک میں بڑھتی ہوئی آبادی پر قابو پانے اور اس حوالے سے ٹھوس اقدامات کے لیے 16 رکنی ‘نیشنل پاپولیشن کونسل’ تشکیل دے دی ہے، جس کا باقاعدہ نوٹیفکیشن بھی جاری کر دیا گیا ہے۔

نوٹیفکیشن کے مطابق، وزیر اعظم پاکستان اس اہم کونسل کے چیئرمین ہوں گے جبکہ چیف آف ڈیفنس فورسز اور آرمی چیف کو کونسل کا رکن مقرر کیا گیا ہے۔ اس کے علاوہ چاروں صوبوں کے وزرائے اعلیٰ، وزیر اعظم آزاد کشمیر اور وزیر اعلیٰ گلگت بلتستان بھی اس اعلیٰ سطح کے فورم کا حصہ ہوں گے۔

کونسل میں وفاقی وزراء بشمول وزیر خزانہ، پلاننگ، صحت، تعلیم، قانون، اطلاعات اور مذہبی امور کو بطور ارکان شامل کیا گیا ہے۔  نیشنل پاپولیشن کونسل ملک میں تیزی سے بڑھتی ہوئی آبادی پر کنٹرول کے لیے ایک جامع اور پائیدار پالیسی مرتب کرے گی۔  آبادی پر قابو پانے کے لیے قومی سطح پر ہم آہنگی اور عوامی حمایت حاصل کرنے کے لیے ٹھوس اقدامات کیے جائیں گے۔کونسل وفاقی اور صوبائی سطح پر آبادی کنٹرول کرنے کی مہم اور اقدامات میں تسلسل اور ہم آہنگی پیدا کرے گی۔ آبادی کنٹرول مہم کو کامیاب بنانے کے لیے مذہبی اسکالرز، سول سوسائٹی اور نجی شعبے (پرائیویٹ سیکٹر) کو بھی اس مہم کا فعال حصہ بنایا جائے گا۔