حکومت پیٹرول پر لیوی کا بھتہ وصول کر رہی ہے، قیمت 225 روپے ہونی چاہیے؛ حافظ نعیم الرحمن

امیر جماعت اسلامی حافظ نعیم الرحمن نے لاہور میں پریس کانفرنس کرتے ہوئے حکومت کی معاشی اور عوامی پالیسیوں پر کڑی تنقید کی ہے۔ انہوں نے کہا کہ عالمی منڈی کے تناسب سے ملک میں پیٹرول کی قیمت 225 روپے سے زیادہ نہیں ہونی چاہیے، لیکن حکومت پیٹرولیم لیوی کی مد میں ‘بھتہ’ وصول کر کے غریب عوام سے 800 ارب روپے سے زائد ٹیکس بٹور رہی ہے، جس کے خلاف اس جمعہ کو ملک گیر احتجاج کیا جائے گا۔ حافظ نعیم الرحمن نے ایل این جی کارگو کی خریداری، گیس لوڈشیڈنگ اور ایل پی جی سلنڈر کی مہنگی فروخت پر تشویش کا اظہار کرتے ہوئے پاک-ایران گیس پائپ لائن منصوبے کو فوری شروع کرنے کا مطالبہ کیا۔ انہوں نے کسانوں کے استحصال اور کپاس کی کاشت میں تاریخی کمی کا ذمہ دار پنجاب حکومت اور شوگر مافیا کو ٹھہرایا اور الزام عائد کیا کہ شریف خاندان کی شوگر ملیں کسانوں کے 4 ارب روپے دبا کر بیٹھی ہیں۔ انہوں نے لیپ ٹاپ اور ٹریکٹر اسکیموں کو فراڈ قرار دیتے ہوئے کہا کہ حکومت نے خود 11 ارب کا جہاز خرید لیا ہے، جبکہ ملک میں لاقانونیت کا یہ عالم ہے کہ پولیس اب ججز کے گھروں میں بھی داخل ہو رہی ہے۔