بچی نے پیسے جمع کرکے دکان خرید لی، اپنی ماں کو ہی ملازم رکھ لیا

چین کے صوبے جیانگشی سے تعلق رکھنے والی 12 سالہ بچی لی یوئی نے اپنی کاروباری ذہانت سے سب کو حیران کر دیا، جب اس نے اپنی جمع پونجی سے ایک دکان خرید کر باقاعدہ کاروبار شروع کر دیا۔

میڈیا رپورٹس کے مطابق لی یوئی نے چینی نئے سال پر ملنے والی رقم کو خرچ کرنے کے بجائے بچت کی صورت میں جمع کیا اور تقریباً 44 ہزار یوآن (17 لاکھ روپے سے زائد) اکٹھے کر لیے۔ بعد ازاں اس نے اس رقم کو کاروبار میں لگانے کا فیصلہ کیا۔

بچی نے بینک میں رقم رکھنے کے بجائے عملی کاروبار کو ترجیح دی اور ایک اسٹیشنری شاپ خرید لی، حالانکہ اس کی والدہ نے ممکنہ نقصان سے خبردار بھی کیا تھا۔

فروری میں نئے سال کے موقع پر دکان کا آغاز کیا گیا، جبکہ مارچ میں اسکول کھلنے کے بعد لی یوئی نے اپنی والدہ کو ماہانہ 3 ہزار یوآن تنخواہ پر ملازم رکھ لیا، جو دکان کے روزمرہ امور سنبھالتی ہیں۔

لی یوئی خود کاروباری فیصلے کرتی ہے، سپلائرز سے رابطہ رکھتی ہے اور قیمتوں کا تعین کرتی ہے۔ وہ روزانہ صبح دکان کھول کر اسکول جاتی ہے اور واپسی پر ہوم ورک کے ساتھ کاروبار میں بھی مدد کرتی ہے۔

مزید برآں، بچی نے جدید تقاضوں کے مطابق آرٹیفیشل انٹیلی جنس ٹولز کا استعمال بھی سیکھ لیا ہے۔ جب دکان کی آمدنی میں کمی آئی تو اس نے قیمتوں میں تقریباً 50 فیصد کمی کی، جس کے بعد خریداروں کی تعداد میں نمایاں اضافہ ہوا۔

رپورٹس کے مطابق لی یوئی اپنی ابتدائی سرمایہ کاری واپس حاصل کر چکی ہے، تاہم اس کی والدہ کا کہنا ہے کہ اگر بیٹی کی تعلیم متاثر ہوئی تو کاروبار فوری طور پر بند کر دیا جائے گا۔