شکست خوردہ جماعتیں نتائج تسلیم کرنے کے بجائے انتشار کی سیاست کر رہی ہیں:عظمیٰ بخاری

صوبائی وزیر اطلاعات ونشریات عظمیٰ بخاری نے پریس کانفرنس کرتے ہوئے کہا ہے کہ شکست خوردہ جماعتیں انتخابی نتائج کو کھلے دل سے تسلیم کرنے کے بجائے ملک میں انتشار اور فساد کی سیاست کر رہی ہیں۔ انہوں نے کہا کہ گزشتہ 18 برسوں کی ناکام کارکردگی چھپانے والی سیاسی جماعتوں کو اپنی کارکردگی اشتہارات کے ذریعے بتانا پڑ رہی ہے۔ عظمیٰ بخاری نے پیپلز پارٹی کو تنقید کا نشانہ بناتے ہوئے کہا کہ میڈیا پر الزامات عائد کرنے کے باوجود الیکشن کمیشن میں کوئی باضابطہ درخواست جمع نہیں کرائی گئی۔ انہوں نے بلاول بھٹو کے بیانات کو سندھ حکومت پر چارج شیٹ قرار دیا اور واضح کیا کہ آزاد کشمیر کے عوام نے مخالفین کی سیاست کو مسترد کر دیا ہے۔ صوبائی وزیر نے عزم ظاہر کیا کہ وزیراعلیٰ مریم نواز کی قیادت میں آزاد کشمیر کو پنجاب کی طرز پر ترقی یافتہ بنایا جائے گا۔