چین: کاسمیٹک سرجری نے خاتون کا چہرہ بگاڑ دیا

چین کے شہر ووہان میں ایک افسوسناک اور حیران کن طبی واقعہ سامنے آیا ہے جہاں 24 سالہ خاتون جبڑے کے محض 2 ملی میٹر کے معمولی ابھار کو درست کروانے کے لیے ووہان یونیورسٹی ڈینٹل اسپتال گئیں، مگر مبینہ طور پر غلط سرجری کے نتیجے میں ان کا جبڑا اندر کرنے کے بجائے 13 ملی میٹر باہر کی جانب دھکیل دیا گیا۔

رپورٹس کے مطابق سرجری کے دوران طبی غفلت کے باعث دھاتی سوئی سے ایک دانت کی جڑ شدید متاثر ہوئی، جبکہ ناک کی ہڈی (نیزل سیپٹم) بھی ٹیڑھی ہو گئی جس کے باعث متاثرہ خاتون کو ناک کے ذریعے سانس لینے میں شدید دشواری کا سامنا ہے۔ طبی ماہرین نے واقعے پر تشویش کا اظہار کرتے ہوئے کہا ہے کہ یہ صرف ایک معمولی سرجیکل غلطی نہیں بلکہ مکمل طور پر الٹا آپریشن کر دیا گیا۔ ماہرین کا کہنا ہے کہ خاتون کا مسئلہ اتنا معمولی تھا کہ اسے بغیر کسی سرجری کے صرف آرتھوڈانٹک علاج (بریسز) سے آسانی سے درست کیا جا سکتا تھا۔

دوسری جانب، سرجری کرنے والے چیف ڈاکٹر نے اپنی غلطی تسلیم کرنے کے بجائے مبینہ طور پر عجیب و غریب دعویٰ کیا کہ خاتون کا چہرہ اب پہلے سے زیادہ ’مغربی اور اسٹائلش‘ دکھائی دیتا ہے۔ متاثرہ خاتون نے اس نااہلی پر مبنی سرجری کے لیے 55 ہزار امریکی ڈالر سے زائد کی بھاری رقم خرچ کی تھی، جبکہ ماہرینِ جراحت کے مطابق اب ان کے چہرے اور جبڑے کو دوبارہ اصل اور درست حالت میں لانے کے لیے کم از کم 5 سال کا عرصہ اور 2 لاکھ امریکی ڈالر سے زائد کا اضافی خرچ آئے گا۔

واقعہ سوشل میڈیا پر وائرل ہونے اور عوامی سطح پر شدید ردعمل کے بعد اسپتال انتظامیہ نے فی الوقت صرف سرجری کی رقم واپس کرنے کی پیشکش کی ہے، تاہم چین کے متعلقہ صحت کے حکام نے واقعے کی باضابطہ تحقیقات شروع کر دی ہیں اور توقع ہے کہ یہ معاملہ جلد قانونی کارروائی تک پہنچے گا۔