وزیراعظم کی آزاد کشمیر الیکشن میں برتری پر نوازشریف، کامیاب امیدواروں کو مبارکباد

وزیراعظم محمد شہباز شریف نے آزاد جموں و کشمیر قانون ساز اسمبلی کے انتخابات کے دوسرے مرحلے میں پاکستان مسلم لیگ (ن) کی واضح برتری پر پارٹی قائد محمد نواز شریف اور تمام کامیاب ہونے والے امیدواروں کو مبارکباد پیش کی ہے۔ وزیراعظم آفس سے جاری کردہ رسمی بیان میں انہوں نے کہا کہ کامیابی کا یہ تسلسل قائد ن لیگ محمد نواز شریف کی دور اندیش قیادت اور پارٹی کارکنان کی انتھک محنت کا نتیجہ ہے۔ شہباز شریف نے کہا کہ نتائج ثابت کرتے ہیں کہ آزاد کشمیر کے عوام کو مسلم لیگ (ن) کی پالیسیوں اور منشور پر کامل اعتماد ہے۔ انہوں نے اس عزم کا اعادہ کیا کہ خطے کی ترقی، خوشحالی اور عوام کی فلاح و بہبود حکومت کی اولین ترجیحات میں شامل رہے گی اور جمہوری عمل میں تمام سیاسی جماعتوں کی بھرپور شرکت آئندہ کے لیے خوش آئند پیش رفت ہے۔