خلیجی ممالک ٹرمپ کی ایران پالیسی سے سخت پریشان اور مایوس ہیں: امریکی اخبار

امریکی اخبار وال اسٹریٹ جرنل نے دعویٰ کیا ہے کہ خلیجی عرب ممالک ایران کے حوالے سے صدر ڈونلڈ ٹرمپ کی مبہم پالیسی اور حکمت عملی سے شدید پریشان اور مایوس ہیں، جس کے پیش نظر خلیجی ریاستوں نے امریکہ سے باضابطہ سیکیورٹی ضمانتوں کا مطالبہ کر دیا ہے۔ رپورٹ کے مطابق پسِ پردہ مذاکرات میں عرب حکام نے امریکی حکمت عملی کے غیر واضح ہونے پر تشویش کا اظہار کرتے ہوئے انکشاف کیا ہے کہ ٹرمپ نے جنگی اقدامات سے قبل خلیجی اتحادیوں کو اعتماد میں نہیں لیا۔ سعودی ولی عہد شہزادہ محمد بن سلمان نے امریکی صدر سے رابطہ کر کے کشیدگی کم کرنے اور سفارتی حل تلاش کرنے پر زور دیا ہے، جبکہ متحدہ عرب امارات (UAE) ایران کے خلاف سخت کارروائی کا حامی ہے۔ دوسری جانب امریکہ کویت سے اپنی فوجی موجودگی کم کرنے پر غور کر رہا ہے جس پر کویتی حکام نے شدید تحفظات ظاہر کرتے ہوئے امریکی دفاعی تعاون کو ناگزیر قرار دیا ہے۔