آزاد کشمیر الیکشن کا دوسرا مرحلہ بھی ن لیگ کے نام، 14 سیٹیں جیت لیں، پیپلزپارٹی 5 پر کامیاب

آزاد جموں و کشمیر قانون ساز اسمبلی انتخابات کا دوسرا مرحلہ بھی پاکستان مسلم لیگ (ن) کے نام رہا، جہاں 20 میں سے 19 نشستوں کے موصول ہونے والے غیر حتمی و غیر سرکاری نتائج کے مطابق مسلم لیگ (ن) نے 14 جبکہ پاکستان پیپلز پارٹی نے 05 نشستوں پر کامیابی حاصل کر لی ہے۔ دوسرے مرحلے میں مظفر آباد ڈویژن کی 08 اور مہاجرین کی 12 نشستوں پر پولنگ ہوئی، جس میں بالخصوص پنجاب میں مقیم مہاجرین کی تمام 10 نشستوں پر ن لیگ نے کلین سویپ کیا۔ دوسری جانب، خراب موسم اور شدید لینڈ سلائیڈنگ کے باعث ایل اے 27 کے تمام 196 پولنگ اسٹیشنوں پر انتخابی عمل ملتوی کر دیا گیا۔ کامیاب ہونے والے نمایاں رہنماؤں میں ن لیگ کے شاہ غلام قادر، راجہ محمد فاروق حیدر اور پیپلز پارٹی کے میاں عبدالوحید اور دیوان علی خان قمر چغتائی شامل ہیں۔