یورپ پہنچنے کی خواہش: آذربائیجان انسانی سمگلروں کا نیا روٹ بن گیا

غیر قانونی طور پر یورپ پہنچنے کی کوشش کرنے والے شہریوں کے لیے آذربائیجان انسانی سمگلروں کا ایک نیا اور خطرناک روٹ بن چکا ہے، جہاں سادہ لوح پاکستانیوں کو سیاحت کے نام پر یورپ منتقلی کے جھوٹے جھانسے دیے جا رہے ہیں۔ سامنے آنے والی دستاویزات کے مطابق، انسانی سمگلر شہریوں کو یہ لالچ دیتے ہیں کہ وہ پہلے وزٹ ویزا پر آذربائیجان کی سیر کریں اور پھر وہاں سے غیر قانونی راستوں (ڈنکی) کے ذریعے یورپ پہنچ کر مستقل سکونت اختیار کر سکتے ہیں۔ اعداد و شمار سے معلوم ہوتا ہے کہ گزشتہ تین برسوں میں مجموعی طور پر 1 لاکھ 66 ہزار 634 پاکستانیوں نے آذربائیجان کا سفر کیا۔

دستاویزات کے حیران کن اعداد و شمار ظاہر کرتے ہیں کہ سال 2024 میں 44 ہزار 943 پاکستانیوں میں سے 2 ہزار 676 افراد واپس نہیں آئے، جبکہ 2025 میں سفر کرنے والے 47 ہزار 491 افراد میں سے 2 ہزار 495 افراد نے وطن واپسی کا رخ نہیں کیا۔ اسی طرح، رواں سال 2026 کے پہلے پانچ ماہ کے دوران ہی 14 ہزار 200 پاکستانی آذربائیجان گئے، جن میں سے 2 ہزار 550 افراد کی واپسی ریکارڈ پر موجود نہیں ہے۔ واپس نہ لوٹنے والے شہریوں کی اس بڑی تعداد نے حکام اور قانون نافذ کرنے والے اداروں میں انسانی سمگلنگ کے اس نئے انٹرنیشنل روٹ کے استعمال کے حوالے سے شدید خدشات پیدا کر دیے ہیں۔