فرانس، جرمنی، برطانیہ اور اٹلی کی اسرائیلی آبادکاری منصوبے کی شدید مذمت

فرانس، جرمنی، برطانیہ اور اٹلی نے ایک مشترکہ اعلامیے میں اسرائیل کے نئے آبادکاری منصوبے کی شدید مذمت کرتے ہوئے اسے فوری طور پر واپس لینے اور مقبوضہ مغربی کنارے میں آبادکاری کی توسیع کا سلسلہ ختم کرنے کا مطالبہ کیا ہے۔ چاروں یورپی ممالک کا کہنا ہے کہ یہ قدم نہ صرف بین الاقوامی قوانین کی خلاف ورزی ہے بلکہ اس سے آزاد فلسطینی ریاست کے قیام اور دو ریاستی حل (Two-State Solution) کے تمام امکانات کو شدید نقصان پہنچے گا۔

مشترکہ اعلامیے میں مغربی کنارے میں فلسطینی شہریوں پر اسرائیلی آبادکاروں کی جانب سے بڑھتے ہوئے تشدد اور حملوں پر بھی گہری تشویش کا اظہار کیا گیا ہے، اور صورتحال کو انتہائی ناگفتہ بہ قرار دیتے ہوئے عالمی برادری سے کشیدگی کم کرانے میں کردار ادا کرنے کا زور دیا گیا ہے۔