روس کے یوکرین میں مزید فضائی حملے، 17 افراد ہلاک، 40 زخمی

روس کی جانب سے یوکرین کے دارالحکومت کیف اور اس کے نواحی علاقوں پر بڑے پیمانے پر کیے گئے تازہ فضائی حملوں میں کم از کم 17 افراد ہلاک اور 40 سے زائد زخمی ہو گئے ہیں۔ یوکرینی فضائیہ کے مطابق روس نے رات کی تاریکی میں درجنوں کروز، بیلسٹک اور ہائپر سونک میزائلوں کے ساتھ ساتھ 168 ڈرونز کے ذریعے حملہ کیا۔ فضائی دفاعی نظام نے تقریباً 90 فیصد ڈرونز اور زیادہ تر کروز میزائلوں کو فضا میں ہی تباہ کر دیا، تاہم بیلسٹک میزائلوں سے ہونے والے نقصانات کی مکمل تفصیلات جاری نہیں کی گئیں۔

یوکرینی صدر ولودی میر زیلنسکی نے ان حملوں کو جنگ کے ساڑھے چار سالہ عرصے کا انتہائی بے رحمانہ اور تباہ کن حملہ قرار دیا۔ انہوں نے مغربی اتحادیوں کو شدید تنقید کا نشانہ بناتے ہوئے کہا کہ ایئر ڈیفنس میزائلوں کی فراہمی میں تاخیر کی قیمت یوکرینی عوام کو اپنی جانوں کے ضیاع کی صورت میں ادا کرنا پڑ رہی ہے۔