امریکی طیارہ بردار بحری جہاز ابراہم لنکن 9 ماہ بعد مشرق وسطیٰ سے روانہ

امریکی طیارہ بردار بحری جہاز یو ایس ایس ’ابراہم لنکن‘ مشرق وسطیٰ میں مسلسل 9 ماہ کی خدمات کے بعد خطے سے روانہ ہو گیا ہے۔ ابراہم لنکن کی جگہ اب امریکی طیارہ بردار جہاز ’جارج واشنگٹن‘ نے مشرق وسطیٰ میں سیکیورٹی اور آپریشنل ذمہ داریاں سنبھال لی ہیں۔ 250 سے زائد دن مسلسل سمندر میں گزارنے کے باعث 5 ہزار اہلکاروں پر مشتمل جہاز کے عملے کو تاریخ کی طویل ترین تعیناتیوں میں سے ایک کا سامنا کرنا پڑا۔

طویل قیام کے دوران ابراہم لنکن کے عملے کے لیے خوراک، ضروری سامان کی شدید قلت اور اہلکاروں کی گرتی ہوئی ذہنی صحت کے حوالے سے تشویشناک اطلاعات سامنے آئی تھیں، جس پر امریکی قانون سازوں اور اہلکاروں کے خاندانوں نے پینٹاگون سے باضابطہ جواب بھی طلب کیا تھا۔ تاہم، امریکی وزیر دفاع پیٹ ہیگستھ نے جہاز پر خراب حالات سے متعلق بعض رپورٹس اور خدشات کو مسترد کر دیا ہے۔