امریکا نے حزب اللہ کے خلاف نئی پابندیوں کا اعلان کر دیا

امریکہ نے لبنان کی تنظیم حزب اللہ کے خلاف نئی پابندیوں کا اعلان کرتے ہوئے اسے ایرانی حکومت کے لیے کام کرنے والی تنظیم کے طور پر دوبارہ نامزد کر دیا ہے۔ امریکی محکمہ خزانہ کی جانب سے جاری کردہ بیان کے مطابق حزب اللہ ایرانی پاسدارانِ انقلاب کی ‘القدس فورس’ کے زیرِ اثر اور اس کی ہدایات کے تحت کارروائیاں انجام دیتی ہے۔ اس کارروائی کے تحت حزب اللہ کے مالیاتی نیٹ ورک اور اس کی معاونت سے وابستہ 10 افراد پر پابندیاں عائد کی گئی ہیں۔

امریکی حکام نے وضاحت کی ہے کہ حزب اللہ کے خلاف اٹھایا گیا یہ نیا قدم ایران پر عائد کی جانے والی حالیہ دیگر پابندیوں کا حصہ نہیں ہے، بلکہ یہ تنظیم کے اپنے مالیاتی نیٹ ورک کو نشانہ بنانے کے لیے کی گئی ایک الگ کارروائی ہے۔ حکام کا مزید کہنا تھا کہ ان نئی پابندیوں کا بنیادی مقصد حزب اللہ کی مالی معاونت کو روکنا اور ایرانی حکومت کے ساتھ اس کے انتظامی و معاشی روابط کو محدود کرنا ہے۔