بانی پی ٹی آئی عمران خان کو اڈیالہ جیل سے شفا انٹرنیشنل ہسپتال منتقل کر دیا گیا

سپریم کورٹ آف پاکستان کے احکامات کی تعمیل کرتے ہوئے پولیس نے بانی پی ٹی آئی عمران خان کو سخت سیکیورٹی حصار میں اڈیالہ جیل سے شفا انٹرنیشنل ہسپتال اسلام آباد منتقل کر دیا ہے۔ عدالتِ عظمیٰ نے بانی پی ٹی آئی کو طبی معائنے کے لیے ہسپتال منتقل کرنے اور ماہر ڈاکٹروں پر مشتمل میڈیکل بورڈ تشکیل دینے کا حکم جاری کیا تھا۔ ہسپتال کے اطراف پولیس اور قانون نافذ کرنے والے اداروں کی بھاری نفری تعینات کر دی گئی ہے اور ان کے علاج و معائنے کے تمام تر انتظامات مکمل کر لیے گئے ہیں۔

قبل ازیں، عمران خان کی بہنیں اور معالج ڈاکٹر عظمیٰ خان اور ڈاکٹر فیصل جیل پہنچے تھے۔ اس حوالے سے وفاقی وزیر قانون اعظم نذیر تارڑ نے واضح کیا تھا کہ بانی پی ٹی آئی کی ہسپتال منتقلی اسلام آباد انتظامیہ کی ذمہ داری ہے، جبکہ وزیراعظم کے مشیر رانا ثناء اللہ نے فیصلے پر تحفظات ظاہر کرتے ہوئے کہا کہ نجی ہسپتال میں منتقلی کا ریلیف قانونی ضوابط سے مطابقت نہیں رکھتا۔ واضح رہے کہ سپریم کورٹ رجسٹرار آفس نے بانی پی ٹی آئی کی منتقلی کے خلاف حکومت کی نظرثانی درخواست پر اعتراضات عائد کر کے اسے واپس کر دیا تھا۔