صدر مملکت کا پاکستان میں قازقستان کے سفیر یرژان کستافن کی خدمات کا اعتراف

صدرِ مملکت آصف علی زرداری نے پاکستان میں قازقستان کے سفیر یرژان کستافن کی 5 سالہ سفارتی خدمات کو سراہتے ہوئے کہا ہے کہ ان کے دور میں دونوں ممالک کے باہمی تعلقات اسٹریٹجک شراکت داری میں تبدیل ہوئے۔ انہوں نے فروری 2026ء میں قازق صدر کاسِم ژومارت توکایف کے 23 سال بعد ہونے والے دورہِ پاکستان کو اہم سنگِ میل قرار دیتے ہوئے معاہدوں پر مؤثر عملدرآمد اور سیاسی خیرسگالی کو تجارت میں بدلنے کی ضرورت پر زور دیا۔ صدر مملکت نے اگلے 2 سالوں میں دوطرفہ تجارت کو 1 ارب ڈالر تک بڑھانے کے امکانات ظاہر کیے اور پاکستان ایجوکیشن انڈومنٹ فنڈ کے لیے 1 ملین ڈالر کی گرانٹ اور گوجرانوالہ میں پاک قازقستان AI سینٹر کے قیام کا خیر مقدم کیا۔ اس موقع پر قازق سفیر نے بتایا کہ دونوں ممالک کے درمیان ریلوے رابطے اور 6 ورکنگ گروپس فعال ہیں، جبکہ قازقستان پاکستانی پھلوں کے لیے ایک بڑی مارکیٹ بن سکتا ہے۔