نور مقدم قتل کیس، مجرم ظاہر جعفر کی سزائے موت پر نظرثانی کی درخواست خارج، فیصلہ جاری

سپریم کورٹ نے نور مقدم قتل کیس میں مرکزی مجرم ظاہر جعفر کی سزائے موت کے خلاف دائر نظرثانی کی درخواست خارج کرنے کا 12 صفحات پر مشتمل تفصیلی فیصلہ جاری کر دیا ہے۔ جسٹس اشتیاق ابراہیم کے تحریر کردہ فیصلے میں کہا گیا ہے کہ مجرم نے ذہنی مریض ہونے کی بنیاد پر سزائے موت کو عمر قید میں تبدیل کرنے کی استدعا کی تھی، لیکن اس حوالے سے ایسے کوئی شواہد پیش نہیں کیے جا سکے جو فیصلے پر نظرثانی کا جواز بن سکیں۔ عدالت نے واضح کیا کہ ریکارڈ سے ثابت ہے کہ مجرم انتہائی سنگین جرم کا مرتکب ہوا ہے اور اس کی سزا میں کمی کی کوئی گنجائش نہیں ہے۔ سپریم کورٹ کے مطابق نظرثانی کا دائرہ اختیار انتہائی محدود ہوتا ہے اور اسے اپیل کے طور پر استعمال نہیں کیا جا سکتا۔ فیصلے میں عالمی و شرعی نکات کا حوالہ دیتے ہوئے کہا گیا ہے کہ دنیا بھر میں ہزاروں خواتین اپنے شناساؤں یا اہل خانہ کے ہاتھوں قتل ہوتی ہیں، جبکہ اسلام نے خواتین کو مکمل تحفظ اور احترام دیا ہے، لہٰذا ان پر تشدد شرعی اور دنیاوی دونوں قوانین کی ورزی ہے۔