افغانستان میں حراست میں لیے گئے اقوام متحدہ کے 2 اہلکار رہا

افغانستان میں طالبان انتظامیہ کی جانب سے حراست میں لیے گئے اقوام متحدہ کے 2 افغان اہلکاروں کو ایک ہفتے سے زائد عرصے بعد رہا کر دیا گیا ہے۔ اقوام متحدہ کے ترجمان سٹیفن دوجارک نے دونوں اہلکاروں کی رہائی کی تصدیق کرتے ہوئے بتایا کہ اقوام متحدہ کے افغانستان مشن (UNAMA) سے تعلق رکھنے والے یہ دونوں ملازمین بالکل خیریت سے ہیں۔ ان دونوں اہلکاروں کو 9 اگست کو افغانستان کے مغربی شہر ہرات سے حراست میں لیا گیا تھا، تاہم اقوام متحدہ کو ان کی گرفتاری کی باضابطہ وجوہات سے آگاہ نہیں کیا گیا۔

ترجمان کے مطابق دونوں اہلکاروں پر عائد تمام تر الزامات واپس لے لیے گئے ہیں اور انہیں مستقبل میں کسی قانونی کارروائی کا سامنا نہیں کرنا پڑے گا۔ سٹیفن دوجارک نے اہلکاروں کی بحفاظت رہائی پر مسرت کا اظہار کرتے ہوئے کہا کہ اقوام متحدہ افغان حکام کے ساتھ مسلسل رابطے میں ہے تاکہ ملک بھر میں اپنے تمام عملے کے استحقاق، تحفظ اور آزادانہ نقل و حرکت کی ضمانت کو یقینی بنایا جا سکے۔