بیرونی سرمایہ کاری لانے کا مشن، صوبائی وزیر چوہدری شافع کینیڈا پہنچ گئے

پنجاب میں بیرونی سرمایہ کاری لانے اور پاکستان اور کینیڈا کے درمیان تجارتی و اقتصادی تعلقات کو وسعت دینے کے مشن کے تحت صوبائی وزیر صنعت و تجارت چوہدری شافع حسین کینیڈا پہنچ گئے ہیں، جہاں ٹورنٹو میں ان کا گرمجوش استقبال کیا گیا۔ چیف آرگنائزر کینیڈا گیٹ وے ایکسپو رانا محمد تنویر اور پاکستان مسلم لیگ کینیڈا کے زیر اہتمام ان کے اعزاز میں استقبالیہ تقریب منعقد کی گئی، جس میں کینیڈا میں پاکستان کے ہائی کمشنر محمد سلیم، قونسل جنرل ٹورنٹو خلیل احمد باجوہ، سفارت کاروں اور اوورسیز پاکستانیوں نے شرکت کی۔

استقبالیہ تقریب سے خطاب کرتے ہوئے چوہدری شافع حسین نے اوورسیز پاکستانیوں کو ملک کا قیمتی اثاثہ قرار دیا اور کینیڈین سرمایہ کاروں کو پنجاب کے اسپیشل اکنامک زونز میں سرمایہ کاری کی دعوت دی۔ انہوں نے بتایا کہ ان زونز میں 10 سال تک انکم ٹیکس کی چھوٹ اور ڈیوٹی فری مشینری کی درآمد جیسی خصوصی مراعات فراہم کی جا رہی ہیں۔ اپنے دورے کے دوران صوبائی وزیر ‘لائف سٹائل ایکسپو’ میں شرکت کے علاوہ کینیڈا کی ٹریڈ اینڈ کامرس، زراعت، کینولا ایسوسی ایشن کے صدر اور دیگر اعلیٰ حکام سے اہم ملاقاتیں کریں گے تاکہ دوطرفہ تجارت کو مزید فروغ دیا جا سکے۔