امریکا: 3 منٹ کے اندر 38 کرتب دِکھانے والا گھوڑا

نارتھ کیرولائنا: امریکہ کی ریاست شمالی کیرولائنا میں ایک 19 سالہ گھوڑے نے اپنی غیر معمولی صلاحیتوں کی بدولت گینیز ورلڈ ریکارڈ قائم کر دیا ہے۔ ‘گرنگو’ نامی اس گھوڑے نے مقررہ وقت سے بھی پہلے یعنی محض 2 منٹ اور 47 سیکنڈ میں 38 مختلف کرتب دکھا کر سب کو دنگ کر دیا۔

گرنگو کی مالکن اور ٹرینر لارین زیپیڈا نے اسے انتہائی پیچیدہ کاموں کی تربیت دی ہے۔ ان کرتبوں میں ناچنا، فٹ بال کو کِک مارنا، جھنڈا لہرانا اور گھنٹی بجانا شامل ہے۔ حیران کن طور پر گرنگو اپنی ناک کے ذریعے کی بورڈ پر دھنیں بجانے کی صلاحیت بھی رکھتا ہے۔

مالکن لارین کا کہنا ہے کہ گرنگو کی اس کامیابی کا مقصد گھوڑوں کی تربیت کرنے والوں کی حوصلہ افزائی کرنا ہے تاکہ وہ جانوروں کے ساتھ بہتر تعلق اور ان کی چھپی ہوئی صلاحیتوں کو اجاگر کر سکیں۔ گینیز ورلڈ ریکارڈز نے باضابطہ طور پر اس کارنامے کی تصدیق کر دی ہے، جس کے بعد گرنگو سوشل میڈیا پر بھی توجہ کا مرکز بن گیا ہے۔