ایشیا کپ 2027ء کیلئے ڈھاکا سمیت وینیوز زیر غور ہیں، بنگلہ دیش کرکٹ بورڈ

بنگلہ دیش کرکٹ بورڈ (بی سی بی) نے اعلان کیا ہے کہ ایشیا کپ 2027ء کی میزبانی کے لیے تیاریاں شروع کر دی گئی ہیں اور اس اہم ترین ٹورنامنٹ کے لیے ڈھاکا سمیت تین ممکنہ وینیوز زیر غور ہیں۔

بی سی بی سیکیورٹی کمیٹی کے چیئرمین سید ابراہیم احمد کے مطابق، ون ڈے (ODI) فارمیٹ کے تحت کھیلے جانے والے ایشیا کپ 2027ء کی میزبانی بنگلہ دیش کو کرنی ہے۔ ٹورنامنٹ کے انعقاد کے لیے درج ذیل تین شہروں ڈھاکا، سلہٹ اور چٹوگرامکو بطور وینیو تجویز کیا گیا ہے۔

سید ابراہیم احمد نے بتایا کہ ایشیا کپ کے انعقاد کے لیے 18 جون سے 4 جولائی کی ونڈو (تاریخیں) رکھی گئی ہے۔ اس سلسلے میں ایشین کرکٹ کونسل (اے سی سی) سے بات چیت ہو چکی ہے اور انہوں نے تینوں مجوزہ وینیوز کی تفصیلات طلب کر لی ہیں۔

بی سی بی سیکیورٹی کمیٹی کے چیئرمین کا مزید کہنا تھا کہ آئندہ چند روز کے اندر تمام معاملات کو حتمی شکل دے دی جائے گی۔ انہوں نے واضح کیا کہ بنگلہ دیش ایونٹ کے کامیاب انعقاد کے لیے پرعزم ہے اور بھارتی کرکٹ ٹیم کے دورے کے لیے سیکیورٹی کے غیر معمولی اور فول پروف انتظامات بڑھانے کے لیے مکمل طور پر تیار ہیں۔