امریکا: غیرمعمولی جِلد کی بیماری کے پھیلاؤ پر ماہرین پریشان

امریکا کے مختلف مضافاتی علاقوں میں گلہریوں میں ایک غیر معمولی جلدی بیماری کے کیسز سامنے آ رہے ہیں، جس کے باعث ان کے جسم پر خوفناک رسولیاں بن رہی ہیں اور جنگلی حیات کے ماہرین نے انہیں غیر رسمی طور پر ’زومبی گلہریوں‘ کا نام دے دیا ہے۔ ماہرین کے مطابق یہ کیفیت “اسکوئرل فائبرومیٹوسس” (Squirrel Fibromatosis) نامی وائرل بیماری کی وجہ سے پیدا ہو رہی ہے، جو لیپوری پاکس وائرس کے باعث پھیلتی ہے۔ یہ وائرس متاثرہ گلہری کے زخموں یا لعاب کے براہِ راست رابطے سے دوسری گلہریوں میں منتقل ہوتا ہے، جس کے نتیجے میں جسم پر مسوں جیسے ابھار بن جاتے ہیں۔ ماہرین کا کہنا ہے کہ اگرچہ کئی گلہریاں بغیر علاج کے بھی صحت یاب ہو جاتی ہیں، تاہم شدید صورتوں میں یہ رسولیاں جسم کے اندرونی اعضا تک پھیل کر جان لیوا ثابت ہو سکتی ہیں۔ وائلڈ لائف حکام نے واضح کیا ہے کہ اسے برطانیہ میں پائی جانے والی “اسکوئرل پاکس” بیماری سے تشبیہ نہیں دینی چاہیے جو سرخ گلہریوں کے لیے خطرناک ہے۔ یہ صورتحال جنگلی حیات کے اداروں کے لیے تشویش کا باعث بنی ہوئی ہے اور شہریوں کو ہدایت کی گئی ہے کہ ایسی گلہریوں کو ہاتھ لگانے یا خوراک دینے سے سخت گریز کریں۔