جماعت اسلامی کا آزاد کشمیر میں قیام امن کیلئے گرینڈ جرگہ تشکیل دینے کا فیصلہ

جماعت اسلامی نے آزاد کشمیر میں امن و امان کے قیام اور جاری بحران کے حل کے لیے ایک ‘گرینڈ جرگہ’ تشکیل دینے کا فیصلہ کیا ہے۔ اس بات کا اعلان امیر جماعت اسلامی حافظ نعیم الرحمن نے مرکزی مجلس شوریٰ کے اجلاس سے خطاب کرتے ہوئے کیا۔ انہوں نے بتایا کہ یہ امن جرگہ جوائنٹ عوامی ایکشن کمیٹی اور حکومت کے درمیان ثالثی کا کردار ادا کرے گا، جس کے لیے نائب امیر لیاقت بلوچ کی سربراہی میں ایک اعلیٰ اختیاراتی کمیٹی قائم کر دی گئی ہے جس میں امیر جماعت اسلامی کشمیر ڈاکٹر مشتاق خان، عبدالرشید ترابی اور ڈاکٹر خالد محمود شامل ہیں۔ حافظ نعیم الرحمن کا کہنا تھا کہ اس جرگہ کمیٹی میں سابق ججز، عسکری شخصیات اور سول سوسائٹی کے ارکان کو بھی شامل کیا جائے گا اور یہ ٹیم جلد راولاکوٹ کا دورہ کر کے جوائنٹ ایکشن کمیٹی سے براہِ راست مذاکرات کرے گی۔ انہوں نے واضح کیا کہ کشمیر پاکستان کی شہ رگ ہے اور وہاں کے موجودہ حالات سے مقبوضہ کشمیر کی تحریکِ آزادی کو ناقابلِ تلافی نقصان پہنچ رہا ہے، لہٰذا حکومت اپنی ضد اور انا چھوڑ کر فوری مذاکرات کا آغاز کرے۔ ان کا مزید کہنا تھا کہ مظاہرین کے مطالبات جائز ہیں، تاہم مہاجرین اور مقبوضہ کشمیر کی نمائندگی کی 12 نشستوں کے معاملے پر بات چیت کے ذریعے قابلِ عمل حل نکالا جائے گا کیونکہ پاکستان اب مزید داخلی انتشار اور خون خرابے کا متحمل نہیں ہو سکتا۔