امریکا میں تارکین وطن کے ’ورک پرمٹ‘ سے متعلق اہم خبر سامنے آگئی

امریکی صدر ڈونلڈ ٹرمپ کی انتظامیہ نے ہیٹی اور 6 دیگر ممالک سے تعلق رکھنے والے لاکھوں تارکین وطن کے ورک پرمٹ کی مدت میں توسیع کا بڑا فیصلہ کیا ہے۔ بین الاقوامی میڈیا رپورٹس کے مطابق، امریکی سٹیزن شپ اینڈ امیگریشن سروسز (USCIS) نے عارضی تحفظ کا درجہ (ٹیمپریری پروٹیکٹیڈ اسٹیٹس – TPS) رکھنے والے ان تارکین وطن کے پرمٹس کی معیاد ختم ہونے سے محض چند گھنٹے قبل اس توسیع کی منظوری دی۔ نئی تاریخوں کے تحت ہیٹی کے شہریوں کے ورک پرمٹ اب 24 جولائی کو ختم ہوں گے، جبکہ ایتھوپیا، شام، صومالیہ، یمن، جنوبی سوڈان اور میانمار کے شہریوں کے پرمٹس میں ایک ہفتے کی توسیع کی گئی ہے۔ واضح رہے کہ گزشتہ ماہ امریکی سپریم کورٹ نے ٹرمپ انتظامیہ کو ہیٹی اور شام کے شہریوں کا عارضی تحفظ کا درجہ ختم کرنے کی اجازت دی تھی، تاہم مزدور تنظیموں نے خبردار کیا تھا کہ پرمٹس کے فوری خاتمے سے امریکی صنعتوں میں افراتفری پیدا ہو سکتی ہے۔ اگرچہ صدر ٹرمپ نے غیر قانونی امیگریشن کے خلاف سخت گیر کریک ڈاؤن اور ملک بدری کی مہم چلا رکھی ہے، تاہم اس حالیہ فیصلے سے قانونی طور پر برسرِروزگار لاکھوں تارکین وطن کو فوری ریلیف ملا ہے۔