مسلسل موبائل اسکرولنگ دماغ پر کیا اثر ڈالتی ہے؟ ماہرین نے اہم حقائق سے آگاہ کردیا

ماہرینِ نفسیات کا کہنا ہے کہ سوشل میڈیا پر صرف چند منٹ کے لیے موبائل اٹھا کر گھنٹوں اسکرولنگ کرتے رہنا محض اتفاق نہیں، بلکہ اس کے پیچھے ایپس کا مخصوص ڈیزائن اور انسانی دماغ کی نفسیات کارفرما ہوتی ہے۔ تحقیقی جائزوں کے مطابق سوشل میڈیا ایپس کو اس انداز میں تیار کیا جاتا ہے کہ صارف اسکرین سے جڑا رہے۔ موبائل پر مسلسل اسکرولنگ دماغ میں موجود خوشی اور انعام کی توقع سے وابستہ کیمیکل ‘ڈوپامائن’ کو متحرک کرتی ہے، جس کی غیر یقینی کیفیت کو ماہرین جوئے کی سلاٹ مشین سے تشبیہ دیتے ہیں۔ چونکہ سوشل میڈیا فیڈ کا کوئی واضح اختتام نہیں ہوتا، اس لیے صارف کو قدرتی طور پر رکنے کا موقع نہیں ملتا، جو طویل مدت میں توجہ مرکوز رکھنے کی صلاحیت کو کم اور یادداشت کو متاثر کر سکتا ہے۔ ماہرین نے خبردار کیا ہے کہ یہ عادت ذہنی دباؤ، بے چینی، مایوسی اور جذباتی تھکن میں اضافے کا باعث بن سکتی ہے۔ اگرچہ سوشل میڈیا براہِ راست دماغ کو تباہ نہیں کرتا، لیکن یہ رویے دماغ کے کام کرنے کے انداز پر ضرور اثر انداز ہوتے ہیں۔ ماہرین نے ذہنی صحت کی بہتری کے لیے اسکرین ٹائم کو محدود کرنے، باقاعدہ وقفے لینے اور مطالعہ، ورزش اور براہِ راست سماجی روابط کو وقت دینے کی تاکید کی ہے۔