امریکی صدر کی نائب صدر اور وزیرخارجہ کو عمان میں مذاکرات جاری رکھنے کی ہدایت

امریکی صدر ڈونلڈ ٹرمپ نے خطے میں بڑھتی ہوئی کشیدگی کو کم کرنے کے لیے اپنے اعلیٰ ترین وفد بشمول نائب صدر جے ڈی وینس، اسٹیو وٹکوف، مارکو روبیو اور جیرڈ کشنر کو عمان میں مذاکرات جاری رکھنے کی اہم ہدایت جاری کر دی ہے۔ امریکی نشریاتی ادارے نے اعلیٰ حکام کے حوالے سے دعویٰ کیا ہے کہ ایرانی حکام نے حال ہی میں صدر ٹرمپ کے قریبی مشیروں سے غیر رسمی رابطے کیے ہیں، جن میں تہران کی جانب سے سفارتی مذاکرات کا سلسلہ برقرار رکھنے کی شدید خواہش کا اظہار کیا گیا ہے۔ امریکی حکام کے مطابق، ایرانی وفد نے آبنائے ہرمز میں تجارتی بحری جہاز پر ہونے والے حالیہ حملے کو ایک بڑی ‘غلطی’ قرار دیتے ہوئے مؤقف اختیار کیا ہے کہ یہ کارروائی ایران کے اندرونی سخت گیر حلقوں نے جاری امن مذاکرات کو سبوتاژ کرنے کے لیے کی تھی۔ دوسری جانب، واشنگٹن نے تہران سے مطالبہ کیا ہے کہ وہ عوامی سطح پر اس غلطی کا باضابطہ اعتراف کرے، جبکہ امریکی حکام نے واضح کیا ہے کہ اگر ایران کی جانب سے دوبارہ کوئی بھی جارحانہ کارروائی کی گئی تو امریکا اپنی پوری فوجی اور اقتصادی طاقت کے ساتھ اس کا فیصلہ کن جواب دے گا۔