پاکستان دنیا کا پانچواں بڑا آبادی والا ملک، 2050 تک آبادی 40 کروڑ تک پہنچنے کا خدشہ

پاکستان آبادی کے لحاظ سے دنیا کا پانچواں بڑا ملک بن چکا ہے، جبکہ ماہرین نے خبردار کیا ہے کہ اگر سالانہ 2.5 فیصد کی موجودہ شرحِ نمو برقرار رہی تو 2050 تک ملک کی آبادی 40 کروڑ تک پہنچ جائے گی۔ وفاقی وزیرِ صحت مصطفیٰ کمال نے اس صورتحال کو تشویشناک قرار دیتے ہوئے آبادی میں اضافے کی شرح کو 1.2 فیصد اور شرحِ پیدائش کو 2 سے کم پر لانے کو ناگزیر قرار دیا ہے۔ انہوں نے انکشاف کیا کہ ہر سال تقریباً 11 ہزار مائیں زچگی کے دوران جان کی بازی ہار جاتی ہیں، جس کے تدارک کے لیے مانع حمل ادویات پر عائد ٹیکس ختم کر دیا گیا ہے۔ مصطفیٰ کمال نے این ایف سی (NFC) ایوارڈ کے موجودہ فارمولے پر بھی سوال اٹھاتے ہوئے کہا کہ اگر فنڈز کی تقسیم 82 فیصد آبادی کی بنیاد پر ہوگی تو کوئی بھی صوبہ اپنی آبادی کم کر کے اپنے پیسے کم نہیں کرنا چاہے گا۔ رپورٹ کے مطابق، اس وقت ملک کی نصف آبادی طبی سہولتوں سے محروم ہے اور ڈھائی کروڑ بچے اسکولوں سے باہر ہیں، جبکہ ماہرین کے مطابق اگر یہی رفتار رہی تو 2050 تک ملک کو مزید 66 ہزار نئے اسکول، 6 لاکھ 79 ہزار اساتذہ اور ساڑھے 6 کروڑ نئی ملازمتوں کی ضرورت ہوگی۔