امریکی حملوں کے ردعمل میں ایران کے خلیجی ممالک پر جوابی میزائل حملے، آبنائے ہرمز تاحکم ثانی بند

ایران پر امریکی فضائی حملوں کے بعد مشرقِ وسطیٰ میں صورتحال انتہائی کشیدہ اور دھماکہ خیز ہو گئی ہے، جہاں ایران کی پاسدارانِ انقلاب اسلامی (IRGC) نے اردن میں واقع پرنس حسن ایئر بیس پر امریکی فوجی تنصیبات کو متعدد بیلسٹک میزائلوں سے نشانہ بنانے کا دعویٰ کیا ہے۔ ایرانی ترجمان کے مطابق، اس حملے میں ایئر بیس کے کمانڈ اینڈ کنٹرول سینٹر اور ایم کیو-9 ڈرونز کے ہینگرز کو کامیابی سے تباہ کیا گیا ہے۔ اس عسکری کارروائی کے ساتھ ہی ایران نے خلیجی ممالک پر بھی میزائلوں اور ڈرونز کی برسات کر دی ہے، جس کے بعد بحرین میں خطرے کے سائرن بج اٹھے ہیں اور بحرینی وزارتِ داخلہ نے اس کی تصدیق کی ہے۔ دوسری جانب، متحدہ عرب امارات کی وزارتِ دفاع نے بتایا کہ ان کا فضائی دفاعی نظام ایران سے آنے والے خطرات کو روکنے میں مصروف ہے، جبکہ قطر نے اپنی حدود میں آنے والے ایک میزائل حملے کو ناکام بنانے کا دعویٰ کیا ہے۔ اس دوران، ایرانی بحریہ نے اہم ترین عالمی تجارتی گزرگاہ ‘آبنائے ہرمز’ کو ہر قسم کی آمد و رفت کے لیے تا حکمِ ثانی بند کر دیا ہے اور خبردار کیا ہے کہ اگر دشمن نے اس صورتحال کا فائدہ اٹھا کر کوئی بھی غلطی کی تو اسے مزید سخت اور خوفناک جواب دیا جائے گا۔